मन..

मन आभाळ आभाळ.. मन पाऊस पाऊस...
मन आभास आभास.. मन सुवास सुवास..

मन चांदवा चांदवा.. नभी चांदण्यांचा थवा..
मन पाखरु पाखरु.. मन पारवा पारवा..

मन वेल्हाळ वेल्हाळ.. मन कल्लोळ कल्लोळ...
मन तुफ़ान.. उधाण.. मन पान सळसळ..

मन अथांग सागर.. मन निळेनिळे पाणी...
मन आठवांचे मोती.. मन विरहाची गाणी..

मन हवंस हवंस... मन नकोसं नकोसं...
मन चांदणी पुनव.. विना चंद्राची आवस...

मन कधी ऐलतीर.. मन कधी पैलतीर..
मन होउन नावाडी.. तुला भेटण्या अधीर..

मन काहुर..प्रतिक्षा.. मन कासाविस आशा..
वाट पाहुन पाहुन... मन विरह.. निराशा..
वाट पाहुन पाहुन... मन... विरह.. निराशा..!