पुन्हा घायाळ होण्यासाठी.......

गुरुवार, ४ जून, २००९

पुन्हा घायाळ होण्यासाठी.......

पुन्हा घायाळ होण्यासाठी.......

तुझी प्रत्येक 'अदा' घाव करते, मला घायाळ करण्यासाठी....
तरीही माझी प्रिती सिध्द होते, पुन्हा घायाळ होण्यासाठी....

प्रकाशाच्या प्रत्येक किरणात, मला तुझं अस्तित्व जाणवतं;
अंधाराला मी टाळत राहतो, तुझाच सहवास घडण्यासाठी....

निळ्या नभाचा निलीमा मला, तुझ्या डोळ्यांसमोर फिका भासतो;
मेघांना मी दूर सारतो, तुझ्या नजरेत बुडण्यासाठी....

खळखळत वाहणारे पाणी, तुझ्या हास्याची आठवण करुन देतं;
नदीतटाशी मी बसून राहतो, तुझा मोहक आवाज स्मरण्यासाठी....

तू जवळ असतेस तेव्हा, चैतन्याला उधाण येतं;
मोरपिसं मी वहीत सांभाळतो, तुझा रेशमी स्पर्श जपण्यासाठी....

स्वप्नांमध्ये माझ्या आता, तुझा नेहमीच वावर असतो;
तरीही मी रात्र-रात्रभर जागतो, तुझ्यावर कविता लिहीण्यासाठी....

वाटते मला, कळावे तुलाही, गूज मनी या लपलेले;
पण भावनेला माझ्या शब्द पुरत नाहीत, माझं प्रेम व्यक्त करण्यासाठी....