पावसाळी भाव

पावसाळी भाव
पाणावलेले सारे भास
चिंब करुनी जातात
वेडया मनात तेव्हा
हळुच रानपक्शी गातात ।

ओघळती अवखळ झरे
नागमोडी नाचतात
हळुच कडयाशी येवुनी
बेबंद प्रपात वाहतात ।

शरीर लगडले धुके
अंगात उमलती दवफ़ुले
निळे ओलसर भाव
भिजल्या निसर्गात दडले ।

निसरडी वाट ओली
चिरुनी जाते जंगलास
ढगात बुडाले कदंब
आवेगी चुंबती गगनास ।

डोंगरापल्याड पाऊसधारा
धरती झुंबर नभात
किणकिणत्या संगीतरागात
मोर नाचती रानात ।

पावसाळी भाव सारे
उतरती सारया हिरवाईत
चांदिची आरास सजते
प्रकाशित ओल्या पानात ।