तू येशील म्हणून मी वाट पाहतो आहे

तू येशील म्हणून मी वाट पाहतो आहे
तीही अशा कातरवेळी
उदाच्या नादलहरीसारख्या संधिप्रकाशात......
माझी सर्व कम्पने इवल्याश्या ओंजळीत जमा होतात
अशा वेळी वाटेकडे पाहणे,
सर्व आयुष्य पाठीशी बांधून एका सूक्ष्म लकेरीत तरंगत जाणे;
जसे अंधारातही ऐकू यावे दूरच्या नदीचे वाहणे.....
मी पाहतो झाडाकडे,पहाडाकडे...
तू येशील म्हणून पारावरती एक नसलेली पणती लावून देतो,
अणि आई नसलेल्या पोरासारखे माझे हे शहाणे डोळे
हलकेच सोडून देतो
नदीच्या प्रवाहात......