सोसला घाटा किती !!(तरही गझल).

आयुष्यसागर खोल अन् नियती तुझ्या लाटा किती....
प्रारब्ध येते आडवे या संकटा छाटा किती !!

मी टाळले कित्येकदा, दु:खे सदाची सोबती...
ज्या आडवू पहाते सुखा, फ़ुटती तया वाटा किती !!

कोरी हिशोबांची वही ना चाळणे वरचेवरी ....
होते किती, उरले किती, अन सोसला घाटा किती !!

अंजारले गोंजारले माझ्या-तुझ्या नात्या जरी...
जा आठवांनो दूर जा! येतो उभा काटा किती !!

ना या मनाचा ठाव रे, मोकाटश्या ढोरापरी ....
बघ परतुनी येते पिका, मारा किती, दाटा किती !!

मी झुंजले, मी संपले, बघ चालले सरणावरी....
दो-चार दिन जे राहिले त्या फ़ोडणे फ़ाटा किती !!