वृत्त (गझल )

वृत्त (गझल )

मी तुला आता स्मराया लागले
वा स्मशानी वावराया लागले ?

पापणीला भार झाली आसवे
प्राण ओले अन तराया लागले

बंद ओठी राहिले हृदयातले
कोण कोणा सावराया लागले ?

ओळखीच्या फक्त झाल्या त्या चुका
ते म्हणाले मी हराया लागले

पाठ केले मी तुला कित्येकदा
वृत्त माझे काचराया लागले

प्रीत आणिक न्याय दोन्ही आंधळे
पांगळ्याला ते धराया लागले ?

वेदनेचा चेहरा मज बोलला
"मी कुरुपाला वराया लागले"

थेंब शाईचा अताशा ओकते
मी (कविता) विषाने बावराया लागले

....कविता