आला आला पाऊस आला…
सर सर सर सर
कोसळुनी सरी
झर झर धावती धरेकडे
पाहुनी तांडव विद्युल्लतेचे
गाली खळीचे फूल पडे
गिर गिर गिर गिर
गिरक्या घेऊनी
एक चिंगी ती हासतसे
टर टर टर टर
फाडुनी कागद
एक बंड्या तो नाव करे
आला आला पाऊस आला
हर्षभरित मन गात असे
विरही त्रस्त त्या भूलोकाला
इंद्रधनुचे स्वप्न पडे
तो ही भिजतो, ती ही भिजते
सवेच भिजते प्रेमही ते
चिंब तनूवर चिंब मनावर
वर्षाऋतू गारुड करे
दूत मेघ तो यक्षजनांचा
दुःख मनीचे जाणतसे
श्रांतविण्या मग दुःखाचे कढ
डोळ्यांमधुनी झरू लागे
प्रेमिक गाती विरही गाती
वृद्धही गाती आनंदे
बालही नाचे थोरही नाचे
नाचे अवघे जीवन ते
तप्त झळा सोसून गांजल्या
जनलोकांना श्रांतविण्या
आला आला पाऊस आला
निर्मोहिंना मोहविण्या
उन्हामागे सावली येते
जगरहाटी सांगतसे
सलाम करूनी तृप्त नेत्री ही
अवघी सृष्टी डोलतसे
अवघी सृष्टी डोलतसे
0 टिप्पणी(ण्या):
टिप्पणी पोस्ट करा