एकदा तरी ….

एकदा तरी ….
एकदा तरी ….

एकदा तरी मला पावसासारखं जगायचंय
चारच महिने फक्त पण खूप खूप बरसायचंय ॥

अचानक येऊन मृद्‍गंध व्हायचंय
शिंपल्यात टपोरा मोती बनायचंय
पानावरून रिमझिम अलगद ओघळायचंय
शुभ्र धबधब्यात खळखळून वहायचंय ॥ १ ॥

रोज रोज कसलं काम ? कधी मनमानी करायचीये
मध्येच कधी सुट्टी घेऊन पुन्हा एकदा गर्जायचंय
माहेरवाशीण पोरीसारखं कधी क्षणभर थबकून जायचंय
निष्ठेने कधी तर रात्र - रात्र ओतायचंय ॥ २ ॥

आनंदासवे कधी भिववूनही टाकायचंय
रुणझुणताना कधी उग्रही बनायचंय
सृष्टीसह सार्‍या सूर्यालाही छळायचंय
तरीही वर पुन्हा ” लोभ असावा ” म्हणायचंय ॥ ३ ॥

मनसोक्त बरसल्यावर हलकेच निघायचंय
वेळ झाली समजताच ” गुड बाय ” म्हणायचंय ॥
एकदा तरी मला पावसासारखं जगायचंय
चारच महिने फक्त पण खूप खूप बरसायचंय ॥

I'm reading: एकदा तरी ….