मी गर्व गीत गाते

मी गर्व गीत गाते
गंधर्व गीत गाते
पाहून बिंब माझे
मनरम्य गीत गाते

डोळ्यांत काजळाचे
हळुवारसे इशारे
ओठांस रिझवणारे
हे सांद्र धुंद वारे
श्वासांत गुंफ़लेले
निश्वास गीत गाते
...मी गर्व गीत गाते
...गंधर्व गीत गाते

हे मंद चालणे मी
गंगेकडून घेते
सर्वांग चांदणे हे
चंद्राकडून घेते
केसांत माळलेले
मी गंधगीत गाते
...मी गर्व गीत गाते
...गंधर्व गीत गाते

मानेत गर्व माझ्या
ती लाट समुद्राची
ताठा मनात माझ्या
ती भेट हिमाद्रीची
आयुष्य युद्ध माझे
झुंजार गीत गाते
...मी गर्व गीत गाते
...गंधर्व गीत गाते

I'm reading: मी गर्व गीत गाते