कधी कधी पाऊस ही येतो असा सुख शिंपडून
थोडा नभात दाटून थोडा पाण्यात सांडून
मन पाखरू ही गाते गाणे मधुर स्वरात
कधी हिरव्या पानात चिंब भिजल्या रानात
कधी कधी वारा ही बेभान भरकटे आनंदात
वेडा होऊन नाचतो जल सरींच्या प्रेमात
प्रीत उनाड वार्याची लाजवते पावसाला
फुले प्रेमाची पालवी एका अबोल क्षणाला
कधी कधी मेघ ही घालतात मायेची पाखरण
पाना-फुलांत होई मग रंग-गंधाची उधळण
धूळ सरली पाण्यात आज ताजे जुने क्षण
मनातल्या कोपर्यात पावसाळी आठवण
कधी कधी ऊन ही पसरते तेज किरणांचे पिऊन
शोभे सृष्टी हिरवी ही साज रंगाचे लेऊन
थेंब पावसाचे कधी ओल्या ओंजली घेऊन
भेट श्रावणाशी होई सप्तरंगात न्हाऊन
0 टिप्पणी(ण्या):
टिप्पणी पोस्ट करा