उशीर

जेव्हा तू ’त्या’ नावाने मारलीस गोंडस हाक
मी थरथर झाले होते कळलेच नाही तेव्हा...

जेव्हा तू नजरेने त्या अर्धा कटाक्ष फ़ेकला
मी थरथर झाले होते कळलेच नाही तेव्हा...

धडपडता मी, तु झटकन सावरले छातीपाशी
मी थरथर झाले होते कळलेच नाही तेव्हा...

जेव्हा तू सहजासहजी घेतला हात हातात
मी थरथर झाले होते कळलेच नाही तेव्हा...

मी सोडवला तो हात अन मागे नव्हते वळले
मी थरथर झाले होते कळलेच नाही तेव्हा...

मन मागे खेचत होते पावले जात वाटेने
मी थरथर झाले होते कळलेच नाही तेव्हा...

कळलेच नाही रे तेव्हा, ना तुला मला कॊणाला
मग उशीर हा होईल, कळलेच नाही तेव्हा...