आपल्या दोघांना गोष्ट फार जुनी नाही….

आपल्या दोघांना

गोष्ट फार जुनी नाही….

तेव्हा पहात होतो

झाडाखाली चोरुन भेटताना

तळ्याकाठी रमताना

बागेत स्वच्छंद भटकताना

वेळीअवेळी, कधी भर पावसात

लोकांना नवनवीन कारणं देत,

एकमेकांच्या डोळ्यांत बघत

तेव्हा दिवस नव्हता पुरत,

आपल्या दोघांना !

पण आताशा पहातोय,

घडी हळूहळू विस्कटताना

होतायत विसंवाद, वितंडवाद

आणि कलहाचा घंटानाद.

हल्ली पहावं लागतंय

एकमेकांशी अकारण भांडताना.

लोक आजही कारणं विचारतायत,

आपल्या दोघांना.

पाहिलेलं कुठलं खरं समजावं-

नक्की काय बिनसलंय, कुणी सांगावं-

या नात्याचं आता काय करावं-

हे समजणार आहे का कधीतरी,

आपल्या दोघांना ?

मराठी कविता