माझ्यातला 'मी'..!!

माझ्यातला 'मी'..!! असेनही जरी मी , रस्त्याच्या कडेस निर्जीव थिजलेला... काळाकुटट, ओबडधोबड, दगड एकाकी निजलेला ! पण, लाभला जर एखादा चुकार पावसाळी स्पर्श, तर दिसेल तुम्हाला... माझ्याही खाली, एक हिरवा ओला अंकुर अलगद रुजलेला! मी कोरडा, भगभगीत,उन्हाच्या रापाने भाजलेला... चिडका, तापट, भेसूर, माझ्याच व्यापाने झिजलेला ! पण कधी आलीच एखादी, हळवी गार झुळूक, तर दिसेल तुम्हाला.... एके काळी, विरहवेळी, पाऊसही माझ्या अश्रूत भिजलेला ! मी पापपुण्याच्या अध्यात्माला सदैव बुजलेला... नास्तिकतेच्या रोगाने, नको इतका सुजलेला ! पण निनादली जर घंटा दूर कुठे राऊळी, तर दिसेल तुम्हाला... मनाच्या गाभाऱ्यात, मी ही देव गुपचूप पुजलेला ! मी रांगडा, निर्लज्ज म्हणून सांप्रत गाजलेला... बेबंध वळू, सराईत कोडगेपणाने माजलेला! पण फिरलेच कधी मोरपीस गालावरून, तर दिसेल तुम्हाला... तिच्या एकाच कटाक्षाने, मी कधी लाल होऊन लाजलेला ! आज जरी मी कित्येक बदलांनी सजलेला... जगाने हजार मापे लावून हवा तसा मोजलेला! पण मागे वळून पहिलेच कधी, तर दिसेल तुम्हाला... जिवंत म्हणून पेटताना...माझ्यातला 'मी' कधीच विझलेला...!!

I'm reading: माझ्यातला 'मी'..!!