एक मिनिट

मला नकोसा तुझा दुरावा एक मिनिट,
जरा जवळ बस; मला जवळ घे एक मिनिट.

तुझ्या प्रितिचे मेघ बरसती जेंव्हा जेंव्हा...
जखमांच्या ग्रीष्मास विसरतो एक मिनिट.

तोडुन सारे तनामनाचे पाश भेटुया....
विसरुन जाऊ मीपण अवघे एक मिनिट.

दुरदुरच्या बेटावरती जाऊन राहु...
भोवतालच्या जगास विसरु एक मिनिट.

किती कापले किती राहिले अंतर बाकी;
जरा पहावे मागे वळुनी एक मिनिट.

जाण्याआधी मनासारखे तुला पाहु दे...
खोलवर बघ डोळ्यांमध्ये एक मिनिट.