|| ॐ नमःशिवाय ||

|| ॐ नमःशिवाय ||

हेमपुरिचे भाग्य उजळले,
उमा सदनी, शंकर आले || ध्रु ||

भाव भक्तिची तिला आवडी,
दंभपणाची तिला वावडी,
निज श्रद्धेचा भाव रोकडी,
गिरिजापति ओवाळले || १ ||

तपोवनिची भक्त अपर्णा,
शिवानंद होता अवतीर्णा,
बिल्वदलाला, करी अर्पणा,
विश्ववंद्या श्वास वाहिले || २ ||

व्रतस्थ होई, उपास धरुनी,
संध्या समयी, स्नान करुनी,
शिवा पुजिले, मनापासुनी,
ॐकारात मन रमले || ३ ||

वसा आचरता, सोमवार सोळा,
धाऊनी आला, स्वयंभू भोळा,
सवे तयाच्या, शिवगण गोळा,
आसमंत तेजाळले || ४ ||

धार दुधाची, पिंडीवरती,
मुखी शिवाची स्तुति-आरती,
भक्तासाठी, शिव पार्वती,
प्रचिती देण्या अवतरले || ५ ||

होई नाहीसा, कोप शिवाचा,
महिमा पावे, शांती-सुखाचा,
आशिष मिळता गोसाव्याचा,
भाग्य कमल उमलले || ६ ||

शिवभक्तिचा अगाध महिमा,
जळती पापे, नुरे काळिमा,
पुण्यराशीला, नुरती सीमा,
विश्वंभराने गृहा व्यापले || ७ ||

पूर्ण जाहले, आज मनोरथ,
सांब सदाशिव दावी सत्पथ,
म्हणुनी लाभला, हा ऐरावत,
जिणे धन्य धन्य झाले || ८ ||

देवी गिरिजा, शंभो शंकर,
महिम्न देवा, तू ही शुभंकर,
आशिष देता, झुकले अंबर,
जीवन ज्योतिर्मय झाले || ९ ||

I'm reading: || ॐ नमःशिवाय ||