मारव्यातून भैरवाकडे

सादळलेली स्वप्नं तशीच
उरलेली मलूल डोळ्यात
उमलायची ध्येयं तशीच
विरलेली म्लान कळ्यात
धुरकटलेल्या क्षणांवर
पांघरुण जणू विस्मृतीचं
भिजकटलेल्या आशांवर
परिधान चढे जागृतीचं
काही घुसमटलेले श्वास
काही जळमटलेले उदास
थोडी चिडचिड थोडी तडफ़ड
मेंदूत अखंड होणारी वळवळ
पाठीशी असणारं तेजोवलय
पुढे दिसणारं गहिरं तमालय
अस्वस्थ करणारी बेचैनी
ओठी उरणारी करूण विराणी
तरी क्षितिजावरचे तांबडे भास
उरलेले प्राण फ़ुंकून उठायचे प्रयास
सारे काबीज करण्याचे वेडे ध्यास
मारव्याला दूर सारून भैरवाचे श्वास