आज पहाटे

आज पहाटे झपाटलेला दिशाहीन मी फिरत निघालो
नदीकाठच्या बागेमधुनी जाताजाता उगाच थमलो..
अजून होता वेळ पुरेसा दिशा उजळुनी उजाडण्याला
अंधुकलेल्या वातावरणी कुंदपणाचा गुबार झाला..
ㅤ
दंहिवर कसले, गहिवरलेल्या आभाळाचे अश्रु ठिबकती
अन्यमनस्का हवा कोंडुनी धुम्मस पडदा सगळ्यावरती..
चुकून कुठल्या झाडावरती घरट्यामधुनी चिवचिव होई
चुकार बगळा नदीकाठचा फडफड करुनी उडून जाई..
ㅤ
अंधाराला चिरून गेला टिटवीचा स्वर तिखट कापरा
मासोळीचा सूर मारता चुबुकचुबुक तो सूर बावरा..
फिकट उजेडाची ये चाहुल, जरा उगवती पांढुरलेली
तरी तजेला नव्हता कसला, झाडेझुडुपे मरगळलेली..
ㅤ
खरेच का रे निसर्ग होता विषण्ण इतका केविलवाणा
किंवा माझ्या मनास वाटे अपुल्यासम तो उदासवाणा..?

I'm reading: आज पहाटे